«Сыгын айдыҥ баштапкы кӱни – Билгирдиҥ кӱни»
деп кӧдӱриҥилӱ линейканыҥ темдектелип берилген сценарийи
Баштаачы-1: Јакшылыкту кӱнле, кару ӱредӱчилер, ӱренчиктер, ада-энелер, айылчылар!
Ӱредӱлӱ јылдыҥ баштапкы кӱниле,
Эбирип келген байрамла!
Билгирдиҥ кӱниле!
Изӱ уткуулыс кару ӱренчиктериске ле ӱредӱчилериске!
Баштаачы -2:
Јаҥы ӱредӱлӱ јылда ӱренчиктерге
Јаан једимдер кӱӱнзейдис.
Бастыразына билгирдиҥ телекейинде
Јеҥӱлерди кӱӱнзейдис!
Баштаачы -1: Сыгын айдыҥ баштапкы кӱни – Билгирдиҥ кӱни. Баштаачы -2: Бӱгӱн балдар ойто ло катап кайкамчылу билгирлерге јолды, jайалталу, бедреништӱ ишти ӱредӱчилериле кожо улалтып баштаар.
Ведущий-1:
Кӧдӱриҥилӱ линейканы ачарына …. школдыҥ директорына ….. сӧсти бередис.
(Директор линейканы ачып јат)
(РФ ла АР гимндери).
Баштаачы -2:. Алтай Республиканыҥ ӱредӱ ле билим министерствозыныҥ специалистине …. сӧс бередис.
(Сӧс айдылат)
Кӱӱлик сый — школ керегинде кожоҥ
Баштаачы -1: Баштапкы класска келгендерге Билгирдиҥ телекейи баштапкы ла катап ачылат. 1-кы класстыҥ ӱренчиктерине сӧсти бередис.
(Баштапкы класска келгендер ӱлгерлер айдадылар)
Ӱренчик 1.
Јакшы болзын, кару јаанам,
Јакшы болзын, кару таадам.
Бӱгӱн менде байрам, сӱӱнчи –
Школго барар ӧйим јетти.
Ӱренчик 2.
Турдым мен эртелеп,
Соок суула јунундым.
Бӱгӱн школго барарым,
Ӱренип мен баштаарым.
Ӱренчик 3.
Бичиктерим белетеп,
Школго мен меҥдейдим.
Таныктарды ӱренип,
Билгирле мен таныжарым.
Ӱренчик 4.
Сӱӱнип школго барайын,
Чыҥдый билгир алайын.
Ӱренип алзам – бойыма туза.
Ӱренбей јӱрзем – бойыма тузак.
Ӱренчик 5.
Иш ле ӱредӱ
Ийнимде јатсын.
Ичкери јолымды
Ол экӱ јарытсын!
Баштаачы -2:
Темирди изӱде согор,
Ӱредӱни јашта баштаар.
Баштапкы класстыҥ ӱренчиктерине су-кадык, ӱредӱде бийик-бийик једимдер кӱӱнзейдис.
Слерге jараш, чӱмдӱ биjезин ….. сыйлайт.
(Кӱрее-биjе )
Баштаачы -1:
Бÿгÿнги школды божодып jаткан ÿренчик — кижи кÿÿндÿ, кандый ла айалгада улусла эрмектежип билер, кандый ла иште, айалгада бойын jайым тудунып, jерин таап алар ла jайым кöрÿмдÿ болор учурлу – деп, jаҥы ӱредӱлик стандарттыҥ некелтелеринде бичилген. Бу ӧрӧги айдылган амадула иштеп турган «эмдиги öйдиҥ», тереҥ санаалу, элбек кöрÿмдÿ ÿредÿчилеристи, јаан једимдерге јеткен ӱренчиктерди темдектейдис.
(Быйанду самаралар, грамоталар берилет)
Баштаачы -2:
Ӱредӱ – билгир тазылы,
Билгир – ырыс тазылы.
Эмди сӧсти кӱндӱлӱ ада-энелерге бередис.
(Сӧстӧр айдылат)
Баштаачы -1:
Кӱзӱҥи ӱни шыҥырап,
Школго бисти кычырат.
Кожо ӱренген нӧкӧрлӧр
Јолыгып, куучын башталат.
Баштаачы -2:
Јарык јараш школыска
Јакшы кӱӱндӱ келерис.
Ӱӱрлежип, јӧптӧжип,
Ӱренерис билгирге.
Бичик-биликти кичееп,
Билерибисти кӧптӧдӧрис.
Баштаачы -1:
Кажы ла ӱренчикке јаан једимдер, ачык јолдор, бийик учуштар ла јарык кӱӱн-санаа кӱӱнзейдис.
